Një fletëthirrje nga SPAK i është dërguar këtë të hënë kreut të Partisë Demokratike, Sali Berisha lidhur me “21 janarin”.
I pyetur nga mediat nëse do të paraqitet të premten në orën 10:00 në SPAK siç kërkohet në fletëthirrje Berisha tha se nuk ka marrë asnjë fletëthirrje. Ai u shpreh se është i gatshëm të shkojë sa herë të thirret lidhur me këtë ngjarje, hetimin e të cilës sipas tij e ka bllokuar kryeministri Edi Rama.
“Personalisht nuk kam marrë asnjë fletë thirrje, për faktin e thjeshtë se Alfred Greca, para se të ma dërgojë mua, ua çon gazetarëve. Unë nuk kam asnjë problem …Unë jam njeriu që kam kërkuar më shumë se kushdo tjetër hetimin e atyre ngjarjeve tragjike. Kam kërkuar prokuror ndërkombëtar për hetimin e tyre. Nga viti 2013 e gjer sot, që prokurorinë e ka në dorë Edi Rama, është vetëm ai që ka penguar hetimi. Ai dhe vetëm ai. Sali Berisha ka kërkuar prokuror ndërkombëtar, ka kërkuar hetim. Ka fatmirësisht, deklaratat e qeverisë së SHBA-së, ku z. Steinberg që ishte asistent i sekretarit të shtetit dhe Thomas Countryman që kërkuan hetimin nga polici tek organizatori. Organizator janë me dokumente se kush është. Pra unë shkoj dhe e kam thënë, në çdo thirrje, se kjo është normale. Por jam thellësisht i hetuar, që të hetohet e plotë kjo ngjarje”, tha Berisha.
