Lëvizjet e nisura nga një grup demokratësh, mes tyre ish-deputeti Ervin Salianji dhe Ilir Alimehmeti, duket se kanë vënë në lëvizje strukturat e Partisë Demokratike.
Megjithëse publikisht ditën e sotme Sali Berisha u shfaq i qetë dhe deklaroi se “nuk ndihet i sfiduar”, burime brenda PD pohojnë se Berisha ka urdhëruar nisjen e një procesi të brendshëm analizash pas valës së reagimeve në bazë.
Vetëm pak orë pas takimeve të organizuara nga grupi i demokratëve që kanë nisur turin e tyre në rrethe, një udhëzim i firmosur nga Sekretari i Përgjithshëm Flamur Noka iu shpërnda degëve të PD në të gjithë vendin. Në dokument Berisha kërkon që menjëherë të fillojë analiza për rezultatin e zgjedhjeve të 11 majit, ku PD shënoi një humbje katastrofë.
Një ditë më parë, Salianji dhe Alimehmeti zhvilluan një takim me strukturat e degës së PD në Durrës. Gjatë fjalimeve, demokratët e pranishëm kërkuan hapur zhvillimin e një analize të thellë të situatës ku ndodhet partia dhe të arsyeve që kanë çuar në një seri humbjesh zgjedhore.
Ndërkohë që vetë Salianji shprehu shqetësimin e dekomratëve të cilët kërkojnë ndryshim. Ish-deputeti theksoi se lëvizja e nisur prej tyre synon ripërtëritjen e Partisë Demokratike dhe kthimin e saj në një alternativë serioze qeverisëse.
