Kryeministri Edi Rama ka ndarë në rrjetet sociale pamjet nga protesta ku shihen protestuesit duke mbajtur një arkmort.
Të shoqëruar me një shkrim të gjatë postimin, kreu i qeverisë i krahason pamjet me ato të 14 shtatorit të vitit 1998 gjatë ceremonisë mortore të Azem Hajdari.
Sipas Ramës protesta nisi si një shprehje e sinqertë e shqetësimeve qytetare, por u devijua dhe u mor peng nga grupe politike dhe individë që kërkojnë destabilizimin e vendit.
“Ajo protestë nuk është më e juaja të dashur flamingo! Ju jeni bërë, pa autorizimin tuaj dhe jashtë dëshirës suaj, alibia e një arkmorti të rikthyer në bulevard si shembëlltyrë e mallkimit që e ka ndjekur Shqipërinë qysh prej vitit 1912; duke përdorur gjithmonë atdheun, flamurin dhe sovranitetin si lëndë të para për të ushqyer urrejtjen mes shqiptarëve dhe si gozhda ndëshkimi që, më shumë se një herë, e kanë kyçur këtë vend në humnerën brenda atij arkmorti.
Ama kjo video-kartolinë e trishtë nuk është kurrësesi një thirrje, që ju të hiqni dorë nga ndjenjat e mendimet që ju bënë bashkë. Jo, kjo është vetëm një ftesë miqësore që ju të mos hiqni dorë në asnjë mënyrë nga kujtesa. Sepse historia nuk është një barrë nga e cila shpëtojmë duke e flakur jashtë vëmendjes sonë, po është busulla që nuk na lejon të humbasim rrugën tonë. Kush harron nga vjen, nuk di më se ku po shkon”, shkruan ndër të tjera Rama
