Viti i ri 2026 i gjen socialistët me llogari të hapura me drejtësinë nga viti i vjetër si asnjëherë tjetër.
Përtej goditjeve në qeveri, ka ndërmarrë një nismë të re, duke urdhëruar që bashkëpunëtorët e tij politikë t’i nënshtrohen një vetingu partiak.
Përballja me veprat penale shkon përtej pushtetit të tij, por për pastrimin e administratës nga punësimet partiake po hedh një hap në dukje të ri. Pas 12 vitesh në pushtet ai kërkon të shmangë nepotizmin partiak me punësimet e të afërmeve të tyre, edhe pse 5 vite më parë shprehej që partitë nuk mund të hetojnë çdo njeri që garon nën logon e PS.
Pesë vite më vonë Edi Rama ka ndryshuar qasje, pasi mendon se bashkëpunëtorët e tij kanë abuzuar me pushtetin për të ndihmuar familjarët. Për të pastruar partinë nga “mëkatet” shefi i mazhorancës ka ngritur një grup “hetimor” me 4 deputetë të rinj me idenë që ata mund të jenë më pak të përlyer në punësimet partiake. Kryetare do të jetë Lindita Nikolla.
Sekretariati i etikës ka nisur punën për përpilimin e formuluarit të vetëdeklarimit, të cilin do të detyrohen ta plotësojnë jo vetëm deputetët, por edhe ministrat, kryebashkiakët e majtë dhe drejtuesit e institucioneve në varësi të pushtetit qendror dhe atij lokal. Pasi ta plotësojnë, të majtët do të duhet të dorëzojnë pranë sekretariatit ku punojnë fëmijët e tyre, bashkëshortët, kunetërit, vjehrria, madje po mendohet të shkohet deri tek dajat apo xhaxhallarët.
Ky është plani A, por duket se Edi Rama nuk beson plotësisht se njerëzit e tij do të tregohen të sinqertë në formular. Këtu hyn në punë plani B. Sipas burimeve, do të aktivizohet një “spiunim” popullor, sipas një mekanizmi denoncimi nga qytetarët.
Edhe pse punën do ta bëjnë të rinjtë, në fund vendimin për dosjen do ta japin të vjetrit. Formularët të cilët pritet të renditen në dosje pa rrezik, të diskutueshme dhe me rrezik, do të shqyrtohen nga Sekretariati i Etikës dhe kryesia e PS, më në krye Edi Ramën.
Puna përgatitore ka nisur më urdhër të kryeministrit nga mbledhja e grupit parlamentar, duke anashkaluar vendimin e partisë, kryesia apo asamble. “Procedurat” mund të jenë shkelur ama deri në fund të 2026-ës, Rama do të ketë një tablo se ku janë të punuar njerëzit e afërt të deputetëve, ministrave apo kryebashkiakëve./ A2 CNN
