Gjykata Kushtetuese ka mbyllur punimet e mbledhjes së sotme duke shtyrë vendimin lidhur me kërkesën e kryeministrit Edi Rama për çështjen e zv.kryeministres Belinda Balluku.
Burime për mediat bëjnë me dije se, ndonëse në rendin e ditës ishte parashikuar shpallja e vendimit mbi ligjshmërinë ose jo të pezullimit të saj nga detyra, masë e vendosur më herët nga Gjykata e Posaçme, kjo çështje nuk u shqyrtua.
Sipas burimeve, Kushtetuesja vlerësoi se koha e mbetur pas trajtimit të dy çështjeve të para nuk ishte e mjaftueshme për të marrë një vendim përfundimtar. Gjyqtarët kanë rënë dakord që në momentin kur të hapet shqyrtimi i çështjes Balluku, vendimi duhet të merret brenda së njëjtës ditë, gjë që sot nuk ishte e mundur për shkak të kufizimeve kohore.
Kjo është mbledhja e dytë që Gjykata Kushtetuese nuk merr një vendim për këtë çështje. Kujtojmë se më 22 janar, u mbajt seanca për shqyrtimin e kërkesës së kryeministrit Edi Rama dhe Këshillit të Ministrave.
