Përplasja mesditën e së premtes mes Ambrozia Metës dhe kryeministrit Edi Rama ka ngjallur debate në rrjetet sociale, duke ndarë opinionin publik, disa e mbështesin gazetaren, ndërsa të tjerë kritikojnë mënyrën e saj të drejtimit të pyetjeve dhe reagimit.
Lidhur me këtë ngjarje, e cila u cilësua dhe si “ngjarja e javës” nga vëmendja që mori, ka reaguar së fundmi gazetari dhe analisti Mentor Kikia.
Përmes një postimi në rrjetet sociale, Kikia ka argumentuar se vendimi i kryeministrit për të përjashtuar gazetaren e Syri Tv dhe atë të Report Tv, Isa Myzyrajn, ishte një veprim i papranueshëm që mund edhe të shmangej.
Më tej, ai vë në dukje se sjellja e gazetares Ambrozia Meta, megjithëse provokuese, nuk është modeli i gazetarisë së mirë.
“Sjellja e gazetares Ambrozia Meta “ha“ diskutim. Shkurt, gazetarja bëri pyetjen e saj dhe i pyeturi dha përgjigjen e tij. Pastaj gazetarja filloi të debatojë e ti kërkojë llogari. Nëse gazetari është i pakënaqur, apo mendon se i pyeturi i dredhoi përgjigjes, e ribën pytjen dhe nëse sërish nuk merr përgjigjen e duhur, sipas tij, kur përgatit lajmin e ballafaqon përgjigjen me fakte që e nxjerrin “zbuluar” kryeministrin.
Kaq! Pra, në një konferencë për shtyp, gazetari nuk ka pse debaton, replikon, diskuton, zihet e grihet me të pyeturin, pse ai nuk përgjigjet siç do gazetari. Ajo që bën Ambrozia, në të tilla aktivitete, është një opozitarizëm shumë i mirë, por nuk mendoj se është edhe një gazetari po kaq e mirë.
Shumë qytetarë e mbështesin këtë lloj gazetarie, pasi janë velur nga një kryeminstër që mban fjalime, monologje, para auditoreve që dëgjojnë gojëhapur apo rrinë kokëulur, pa folur e pa reaguar. Dhe kur një vajzë e re “ia bën 8 me 2” këtij kryeministri, ajo merr pastaj atributet e një heroine. Por unë mendoj se opozitarizmi politik, opozitarizmi qytetar dhe media janë dhe duhet të jenë tri gjëra të ndryshme, ku secila ka rolin dhe funksionim e saj”, shkruan Kikia.
