Drejtori i Përgjithshëm i Policisë së Shtetit, Skënder Hita, ka vendosur të dalë personalisht në terren, me qëllim për të monitoruar nga afër situatën dhe masat e ndërmarra, vetëm dy orë para nisjes së protestës së paralajmëruar këtë të premte nga Partia Demokratike.
Hita, i cili mori detyrën pas paraardhësit të tij, Ilir Proda, ka zgjedhur të jetë vetë në krye të operacionit në terren, duke kontrolluar me qëllim garantimin e rendit publik. Ky vendim i Hitës për të marrë vetë situatën në “duar”, ka ardhur pas protesta vetë mëparshme që çuan në shkarkimin e Prodës, për shkak të dështimit në menaxhimin e tubimit dhe garantimin e sigurisë.
Kujtojmë se gjatë protestës së mëparshme të opozitës u shënuan incidente të rënda pranë Vilës 31, ish-rezidencës së diktatorit Enver Hoxha, ku protestuesit hodhën molotovë dhe fishekzjarrë. Në ato momente, brenda ambienteve ndodheshin shtetas të huaj, pasi godina ishte përshtatur si hapësirë pritëse për artistë. Pas këtyre tensioneve erdhi dhe shkarkimi i Prodës.
