Vijon operacioni i bujshëm i policisë së shtetit “Fijet”. Së fundmi 37 kamera sigurie u çmontuan në disa lagje të Elbasanit, Gramshit dhe Peqin dhe po hetohen 10 persona.
Gjithashtu strukturat hetimore në bashkëpunim me Komisariatet e Policisë çmontuan së fundi, 65 kamera të vendosura në Tiranë, si dhe nisën hetimet për 7 shtetas. Kamerat ishin vendosur për qëllime kriminale, si edhe për të monitoruar lëvizjet e Policisë, ndaj forcat blu kanë organizuar punën për evidentimin dhe çmontimin e këtyre kamerave, identifikimin e pronarëve të këtyre kamerave, si dhe për dokumentimin e plotë ligjor të qëllimit të përdorimit.
Operacioni ‘Fijet’ nisi në Shkodër ku u çmontuan kamerat “spiune” të vendosura në lagjet ku banonin anëtarë të grupeve kriminale me qëllim vëzhgimin e lëvizjeve të policisë. Më pas operacioni vijoi në të gjithë territorin e vendit. Deri më tani në të gjithë vendin janë çmontuar rreth 386 kamera sigurie të vendosura nga grupet kriminale.
