Kryeministri Edi Rama ka marrë pjesë në konkursin ndërkombëtar të projektit “Auto Moto Park Albania” që do të ndërtohet në qytetin e Elbasanit. 5 studiot më të mira të projektimit të strukturave të tilla, autorë të pistave më të njohura të Formula 1, kanë shprehur interes për këtë investim.
Do të jetë një pistë prej më shumë se 3 km ku do të zhvillohen një sërë aktivitetesh, gara sipas standardeve të Federatës Ndërkombëtare të Automobileve. Në fjalën e tij, kreu i qeverisë tha se ky projekt gjigant do të hapë rrugën për një epokë të re për Elbasanin dhë Shqipërinë.
“Event historik për auto-motorizmin shqiptar por dhe për Shqipërinë. Do të përzgjedhim projektin më të mirë për t’i hapur rrugë një epoke të re për Elbasanin dhe Shqipërinë. Ky projekt është fryti i këtij frymëzimi për të cilin fola dhe jam i bindur se do ta realizojmë duke bashkuar të gjitha forcat. Siç shumë gjëra deri dje na dukeshin të pamundura tani janë në rrugën që po bëhen të mundura. Edhe ajo që dukej e pamundur që në Shqipëri të kishim një garë të Formula 1, e ardhmja do të tregojë se edhe kjo është e mundur”, tha Rama.
