Kryeministri i vendit Edi Rama ka një reagim të gjatë në rrjetet sociale sa i takon të gjitha aludimeve që janë ngritur për koncertin e bujshëm të Kanye West që do të mbahet në Tiranë më 11 korrik.
Në rrjetet sociale ka qarkulluar pretendimi se janë plot 50 milionë euro, gjë të cilën kreu i qeverisë e quan “gënjeshtër me bisht akrepi”.
Rama sqaron se koncerti është një ngjarje botërore, i cili do të financohet tërësisht nga sponsorat dhe shitja e biletave, ku Shqipëria si vend mikpritës luan rolin me mbështetje logjistike.
“Dështakzemërakët e bashkuar, për ta kthyer në kos për urinë e tyre për pushtet e për lavdi, rrjedhën e pastër të ujit të protestës së flamingove, i janë turrur deri edhe koncertit unikal të Kanye West.* Ja ku janë, 50 milionë eurot që paska dhënë ministri ynë për një natë koncert, ndërsa spitalet s’paskan ilaçe.
* A e dëgjuat!
Një gënjeshtër me bisht, me bisht akrepi madje, e sajuar për të pickuar e për të helmuar mendjen e kujtdo që përjeton me konfuzion këtë çorodi. “Ja ku janë 50 milionë eurot… vetëm për një natë koncert!”
Por si i bëhet kur je i detyruar “in extremis”, të ndërhysh siç bëmë faktikisht vetëm mbrëmë, me 4 milionë euro, për të mos lejuar anulimin e një koncerti të shumëpritur dhe turpërimin e Shqipërisë, në rradhë të parë para atyre dhjetëra mijëra blerësve të huaj të biletave, të cilët janë më shumë sesa tifozët e huaj që erdhën në Tiranë për finalen e Conference League“, shtron pyetjen numri një i kabinetit.
