Ministrja e Shëndetësisë, Klodiana Spahiu ka mbërritur mbrëmë te Spitali i Traumës për të vizituar vetë 19-vjeçarin nga Librazhdi, Ledion Balla, i cili përfundoi me këmbë të thyer gjatë tensioneve mes efektivëve dhe protestuesve, ditën e djeshme.
Siç mund ta shikoni dhe në pamjet e publikuara, ministrja Spahiu e merakosur për gjendjen shëndetësore të të riut, e pyet Ledionin se si ndihet, ndërsa i qëndron pranë duke premtuar se stafi mjekësor i Traumës do të kujdeset për të.
Ndërkohë, 19-vjeçari dëgjohet duke i thënë ministres se nuk kishte lidhje me protestën dhe se në momentin e tensioneve ai ishte duke kaluar në rrugë, kur papritmas efektivët e kanë marrë në krahë, ndërsa këmba e tij e thyer bëri bujë në rrjet.
Siç raportuam dhe mbrëmë, si pasojë e dhunës së ushtruar ndaj 19-vjeçarit Ledion, kryepolici Hita pezulloi nga detyra katër efektivë dhe shefi i Komisariatit të Policisë Nr. 1, ndërsa bëhet me dije se kanë nisur hetimet nga Agjencia e Mbikëqyrjes Policore (AMP) dhe Prokuroria.
