Forcat speciale RENEA kanë zbritur mbrëmjen e sotme në terren, teksa protesta në bulevardin “Dëshmorët e Kombit” vijon mes tensioneve dhe përplasjeve.
Efektivët e repartit elitë janë pozicionuar në disa pika pranë Kryeministrisë. Një pjesë e tyre janë vendosur përpara godinës qeveritare, ndërsa të tjerë, së bashku me komandantin e repartit, janë parë në afërsi të protestuesve.
Prania e RENEA-s në protestë tërheq vëmendjen, pasi bëhet fjalë për një strukturë të specializuar për ndërhyrje në situata me rrezikshmëri të lartë, përfshirë operacionet kundër personave të armatosur dhe kapjen e elementëve të rrezikshëm.
Për momentin, nuk ka një njoftim zyrtar që të sqarojë arsyen konkrete të angazhimit të forcave speciale. Mbetet e paqartë nëse dislokimi lidhet me ndonjë informacion për praninë e personave të armatosur mes protestuesve apo me vlerësime të tjera të sigurisë.
Ndërsa situata në bulevard vijon të monitorohet nga forcat e policisë, pritet të mësohen në vijim më shumë detaje mbi arsyet që çuan në angazhimin e RENEA-s.
Protestuesit sapo i kanë vënë flakën derës kryesore të ish-hotel ‘Dajtit’ gjithashtu ne flakë është edhe Gjykata e Lartë. E gjithë Tirana ndodhet në kaos total, ku policia e ka të pamundur pasi po përballet me dhunën e paprecedente.
