Kryeministri Edi Rama, deklaroi se të rinjtë po manipulohen dhe po përdoren nga grupe të ekstremizuara për të nxitur urrejtje kundër qeverisë.
Në një daljë ‘Live’ në rrjetet sociale, Rama e cilësoi situatën si një kurth, ku sipas tij, persona të përfaqësuar nga ‘antifa’ kanë marrë peng protestën.
Njëkohësisht, Rama nuk i kurseu akuzat edhe ndaj kompanive mediatike dhe Prokurorisë së Tiranës, që e fajëson se nuk ka vepruar siç duhet, në lidhje me dokumentet e dorëzuara nga tatimet për raste të dyshuara të evazionit fiskal me vlerë miliona euro.
“Kjo nuk është lëvizje studentore. Po ua përsëris, ky është një kurth. Një kurth i madh jo për mua, por për Shqipërinë. Është një kurth ku njerëz të paguar, ku njerëz të ekstremizuar, ku njerëz të hutuar dhe të manipuluar dhe ku të rejat dhe të rinj idealistë patjetër, por që janë pre’ e një ideologjie marrëzie të përfaqësuar nga e ashtuquajtura ‘’antifa’’, antifashistët. Këta kanë marrë peng të tërë të tjerët. Studentët e mjekësisë, 95% e tyre nuk janë në protestë edhe pse mund të kenë simpatitë e tyre etj, por nuk janë në atë protestë, nuk janë atje me gurët përpara dhe me maska përpara, por ama nga ana tjetër nuk duan as dialog. Pse e them këtë? E them këtë, jo se unë po them ata s’duan. Përkundrazi, unë jam këtu në çdo moment, por në atë lëvizjen rinore, atëherë po, ishin 20 e ca mijë studentë atje. Jo studentët e pronarit të News 24-ës. Televizioni prej të cilit kam marrë para disa javësh mesazh nga një kameraman, nuk ja them emrin e kam mesazhin aty. “Na ndihmo se nuk na paguhen sigurimet shoqërore prej vitesh dhe i marrim rrogat si lëmosha, një muaj po, tre muaj jo”. Në ndërkohë që ky pronari që prodhon lajme me rebelim kudo që “u ngritën këta”, “u ngritën ata”, “plasi në Vlorë, plasi në Shkodër”, ka imunitet. Ja ka dhënë imunitetin Prokuroria e Tiranës, ku prej vitesh përfaqësuesit e shtetit, Drejtoria e Tatimeve ka çuar dokumenta padi për evazion fiskal me miliona e me miliona e me miliona euro. Dhe e bukura është që pasi çohen dokumentat e evazionit fiskal, pra të fshehjes së parave, prokuroria merr në pyetje punonjësit e tij”, theksoi Rama.
