Akademiku Luan Omari është ndarë nga jeta këtë të enjte, në moshën 101. Lajmi i trishtë është bërë i ditur nga Akademia e Shkencave e Shqipërisë, e cila shpreh ngushëllimet për familjarët, miqtë, kolegët dhe gjithë bashkësinë shkencore.
Përmes një postimi në rrjetet sociale, Akademia e Shkencave shprehet se me largimin e Omarit shkenca dhe kultura shqiptare humbasin një prej personaliteteve të rëndësishme të së drejtës dhe mendimit juridik, i cili ia kushtoi jetën kërkimit shkencor, mësimdhënies dhe zhvillimit të institucioneve akademike në vend.
Omari lindi më 10 qershor 1925 në Tiranë, në një familje me tradita të forta kulturore dhe arsimore. Arsimin e hershëm e kreu në Bari të Italisë, ndërsa diplomën e maturës e mori në gjimnazin e Tiranës. Studimet e larta për drejtësi i vijoi në Beograd dhe Sofje, ku u diplomua për shkencat juridike, duke shërbyer si një nga juristët më të përgatitur të vendit.
