Vazhdojnë me intensitet të lartë shpimet për gjetjen e naftës dhe gazit në pusin “Shpirag 5” dhe kompania kërkuese është optimiste për zbulimet që do të bëjë.
Zona e Shpiragut në qarkun e Beratit, është e vetmja ku po kërkohet në territorin Shqiptar, ndërsa kompania e “Shell-it” e ka krahasuar këtë zonë me Val d’agrin në Italinë Jugore, ku prodhohen çdo 24 orë, 85 mijë fuçi, e që me çmimin e bursës arrijnë deri në 7-8 mln euro në ditë.
“Aktualisht, ne po kryejmë shpime në pusin Shpiragu-5, që është pjesë e programit tonë të vlerësimit për zbulimin e Shpiragut. Shell ka investuar miliona dollarë në Shqipëri deri tani. Nëse faza e vlerësimit rezulton e suksesshme, atëherë ne do të përpiqemi të prodhojmë naftë dhe gaz natyror në partneritet me qeverinë e Shqipërisë. Projekte të tilla zhvillimi mund të jenë një faktor transformimi për një vend pritës, duke gjeneruar të ardhura nga taksat, duke krijuar vende pune dhe duke tërhequr investime të huaja në ekonomi”, shprehet kompania e Shell-it.
Gjithashtu edhe Kryeministri Edi Rama pohoi disa jave me pare se nëse Shqipëria gjen rrugën për të promovuar dhe shitur gazin dhe naftën, që janë zbuluar në Shpirag atëherë vendi ynë do të kthehet në një fuqi të rëndësishme ekonomike në rajon.
