Gjykata e Posaçme ka sqaruar gazetarët përmes një njoftimi zyrtar pas lajmeve të shpërndara në media për dy masat e sigurisë të vendosura ndaj zv.kryeministres, Belinda Balluku.
Zëdhënësja e GJKKO, bën me dije se gjykata do të shprehet në një moment tjetër procedurial, duke mos dhënë më tepër detaje.
“Në lidhje me lajmin e publikuar mbi caktimin e masave të sigurisë ndaj Zv/kryeministres Belinda Balluku, duke qenë se këto masa kanë karakter sekret, gjykata në këtë fazë nuk ka informacion për t’i komunikuar medias dhe publikut. Në momentin e duhur procedurial do të njoftoheni zyrtarisht!”, thuhet në komunikimin e GJKKO-së.
Gjatë kësaj të enjte në media qarkulluan raportime se ndaj Ballukut është vendosur pezullimi nga detyra dhe bllokimi i pasaportës. Sipas këtyre burimeve, masa është firmosur nga gjyqtari Erion Çela, me kërkesë të prokurorit Dritan Prençi, në kuadër të një hetimi për shkelje të barazisë në tendera.
