Policia ka sekuestruar pasurinë e ish-zyrtares Alda Klosi, e cila ndodhet në burg. Deri më tani është vënë në sekuestro një garazh dhe një apartament në rrugën “Kongresi i Lushnjës” në Tiranë. Ndërkohë po verifikohen pasuritë e tjera.
Klosi është arrestuar disa ditë më parë pasi akuzohet për fshehje të ardhurash dhe pastrim parash. Klosi u prangos pas dëshmisë së pastrueses së saj Rozeta Dobi, e cila zbuloi skemën e shumave të mëdha të parave që ajo grabiti nga banesa e ish-zyrtares.
Dobi, e cila është pas hekurave së bashku me djalin e saj, Havier Dobi, rrëfeu se shumat e mëdha të parave kishin mbërritur me qese te shtëpia e Klosit, ndërsa kjo e fundit i kishte kërkuar pastrueses t’i vidhte paratë me konsensus, duke inskenuar kështu të gjithë ngjarjen. Origjina e parave mbetet ende mister.
