Në prag të protestës së paralajmëruar nga Partia Demokratike, punonjësit e shërbimit kanë nisur përgatitjet për sigurinë e godinës së qeverisë.
Mbrëmjen e së shtunës, dyert dhe hyrjet e Kryeministrisë u mbuluan me mbrojtëse metalike dhe struktura hekuri, një masë e ndërmarrë sa herë priten tubime të mëdha para institucionit.
Sipas PD-së, protesta e së hënës do të jetë vetëm hapi i parë i një serie tubimesh të përjavshme, të konceptuara si një platformë parlamentare në Bulevard, me podium dhe foltore të hapur (e ngjashme me çadrën e Lulzim Bashës).
PD akuzon mazhorancën se po pengon zhvillimin normal të seancave parlamentare, ndërsa paralajmëron se protesta do të jetë pa afat, deri në reflektimin e qeverisë.
