Gara në grupin e kualifikueseve të Euro 2024 sa vjen dhe bëhet më e fortë. Përveç Republikës Çeke dhe Polonisë, tashmë Shqipërisë i shtohet edhe një tjetër rival në kualifikueset e Euro 2024.
Bëhet fjalë për Moldavinë e cila është befasia e grupit, ku tashmë ka marrë vendin e dytë 2 pikë më pak se Shqipëria kryesuese. Moldavët kanë mposhtur Ishujt Faroe në transfertë. Ndeshja përfundoi me shifrat 0-1 për Moldavinë dhe u vendos nga Vadim Rata në minutën e 53-të.
Matematikisht, nëse Shqipëria siguron 5 pikë në tre ndeshjet e mbetura në grupin e saj, do të ketë të sigurt biletën për turne në Gjermani, pasi do të bëhej një nga dy skuadrat e para në grup. Duke llogaritur që 2 nga 3 ndeshjet e kuqezinjve janë në “Air Albania”, ky objektiv bëhet mëse i arritshëm.
