Kryeministri Edi Rama ka nisur prej ditësh shpërndarjen e dhuratave për fëmijët, në prag të festave të fundvitit. Ditë më parë ai ka takuar fëmijët që merrnin kujdes shëndetësor te Pediatria, ndërsa ditët e fundit ka zgjedhur të shkojë nëpër familje.
Vizitat janë përqendruar kryesisht te familjet me nënat familjare, ose ato me vështirësi ekonomike, si për të theksuar ligjin e ri që hyn në fuqi nga 1 janari. Në bazë të vendimit të ri të qeverisë shqiptare, nënat që do të kujdesen për fëmijët nën moshën 5 vjeç dhe nuk do të punojnë, do t’u njihen vitet e punës. Kusht për të përfituar nga ky vendim është që nëna të ketë 3 fëmijë, ose më shumë dhe njëri prej tyre të jetë nën moshën 5 vjeç.
Ajo që bie në sy në shpërndarjen e dhuratave, nëse më përpara kryeministri zgjidhte ta bënte vetë, tashmë ka angazhuar ministrat. Në postimet e fundit, në faqen zyrtare të kryeministrit, shihen disa prej ministrave duke vizituar familjet në këtë prag festash për të shpërndarë dhurata.
