Ambasada e SHBA ka reaguar përplasjet brenda Partisë Demokratike, ku shprehet se institucionet demokratike funksionale, përfshi një opozitë, janë jetike për çdo demokraci të shëndetshme.
Në një reagim për News24, Ambasada e SHBA shprehet se nuk është roli i saj që të zgjedhë se kush udhëheq partitë politike në Shqipëri, por shton se nuk kanë ndryshuar pozicionin në lidhje me individë të shpallur non-grata në Shqipëri.
Reagimi i plotë i Ambasadës së SHBA: “Shtetet e Bashkuara besojnë se institucionet demokratike funksionale, përfshi një opozitë, janë jetike për çdo demokraci të shëndetshme. Shtetet e Bashkuara takohen rregullisht me komisionet parlamentare në lidhje me legjislacion kyç, të tillë si ai për Avokatin e Popullit, i cili luan një rol të rëndësishëm në reformën në drejtësi. Nuk është roli i ambasadës që të zgjedhë se kush udhëheq partitë politike në Shqipëri. Gjithashtu, nuk e kemi ndryshuar pozicionin tonë në lidhje me individë të shpallur (non-grata) në Shqipëri dhe nxisim të gjithë aktorët që të shqyrtojnë me kujdes angazhimet e tyre me figura të tilla”
