Asim Vokshi është zgjedhur anëtari i ri i Gjykatës Kushtetuese. Vendimi u mor në mbledhjen e anëtarëve të Gjykatës së Lartë, organi i emërtesës.
Vokshi u shpall automatikisht fitues pasi asnjëri nga tre kandidatët, të cilët kishin marrë më shumë pikë nga KED, nuk mori 3/5 e votave. Kështu Vokshi, i renditur i pari në pikëzim (89.5 pikë) u zgjodh anëtari që do të zëvendësojë Zaçajn.
Naureda Llagami mori 8 vota, Asim Vokshi 6 ndërsa kandidati tjetër Florian Ballhysa asnjë votë. Një votë u konstatua e pavlefshme. Vokshi do të zëvendësojë vetëm mandatin e Zaçajt si anëtar i Kushtetueses, ndërsa procedurat për zgjedhjen e kryetarit të ri të Gjykatës do nisin më pas.
“Në kushtet kur parashikimet ligjore përcaktojnë se shpallet fitues kandidati që merr 3/5 e votave të pjesëmarrësve, dhe në rastin e votimit të sotëm ku asnjë nga kandidatët nuk e arriti këtë prag, komisioni shpall fitues kandidatin e renditur të parin nga Këshilli i Emërimeve në Drejtësi. Në këto kushte, z. Asim Vokshi zgjidhet anëtar i Gjykatës Kushtetuese”, njoftoi Gjykata e Lartë.
