Ish-presidenti Ilir Meta, i ka drejtuar një letër kreut të SPAK, Klodian Braho. Përmes kësaj letre ai kërkon publikimin e kontratës së lobimit të LSI-së në SHBA, në vitin 2016.
Presidenti i PL-së, i ka këkruar më tej Brahos që të mos bëhet asnjë kërkesë e re ndaj autoriteteve amerikane për shtyrjen e afatit të mosbërjes publike të dokumeneve, të cilat kanë lidhje me këtë kontratë lobimi të bërë nga LSI me GSIS.
“Në radhë të parë, unë kërkoj nga ju si Drejtues i SPAK-ut, të mos bëhet një kërkesë e re për shtyrjen e bërjes publike të gjithë informacionit, që ka të bëjë me kontratën GSIS-LSI, pasi kjo do të bënte të pamundur mbrojtjen time efektive lidhur me akuzat e ngritura për këtë çështje, ndërkohë që çështja ka kaluar në gjykimin në themel” ka shkruar ndër të tjera Meta.
Meta ka cituar në letrën e tiij edhe një përgjigje të Departamentit Amerikan të Drejtësisë, e cila i është drejtuar Ministrisë së Shëndetësisë në Shqipëri.
“Në këtë përgjigje drejtuar Ministrisë së Drejtësisë së Shqipërisë, shkruhet se nëse autoritetet shqiptare kanë nevojë për një zgjatje të periudhës 2-vjeçare të mosbërjes publike të informacionit, mund ta kërkojnë me shpjegime të detajuara. Kjo përgjigje e datës 15 korrik 2024, drejtuar me e-mail Znj. Alba Thoma, Drejtore e Përgjithshme e Ministrisë së Drejtësisë nga Drejtori i Departamentit të Drejtësisë i SHBA, Z. Vaughn A. Ary dhe Prokurori Z. Michael E. Eaton, natyrisht që vjen në përgjigje të kërkesave specifike të bëra nga pala shqiptare”, ka shkruar ish-presidenti në letër.
Më tej Meta është ndalur në një tjetër episod i cili lidhet me hetimet e SPAK, ku pretendon se prokurorët kanë informuar autoritetet amerikane se ai ka përdorur tre karta bankare amerikane, dhe sipas tij për këtë është qartësuar nga autoritetet e SHBA se në fakt përodimi i kartave është bërë nga Monika Kryemadhi.
