Emisioni “Stop” transmetoi disa raste të abuzimit me ‘Kempet’ ku mashtrusa te ndryshem hiqen si të paaftë për të marrë statusin e invaliditetit ndërkohë që gëzojnë shëndet të plotë dhe punojnë normalisht.
Por në Shqipëri ka edhe njerëz të ndershëm të cilët janë shembull për shoqërinë. Rasti i Adevijës (një grua që nuk shikon) nuk pranon të marrë kempin dhe të qëndrojë në shtëpi por punon 5 orë në ditë duke jetuar në mënyrë dinjitoze.
Ajo ka shkuar në zyrën e biznesmenit Gjergj Luca, për t’i kërkuar një punë të dytë dhe e ka fituar vendin e punës. Luca i bën thirrje të gjithëve, të punojnë dhe Kempi të mos shkojë për persona të aftë për punë.
“Adevija do fillojë punë tek ne. Unë u sensibilizova nga emisioni në Klan, nga emisioni i Saimirit dhe i Gentit që janë djem kaq të talentuar që ngrejnë edhe një problem shumë të madh për vendin tonë, një ngërç të madh, një krim që i bëhet vendit tonë dhe njerëzve që kanë dëshirë për të punuar për të ecur përpara. Dua t’i bëj thirrje atyre njerëzve, stop më me rrena, ato lekë janë lekë që merrni nëpër Kempe, nëpër asistenca sociale që duhet të shkojnë për prindërit që punojnë, që sakrifikojnë për fëmijët e tyre, për prindërit që duan t’i edukojnë fëmijët me punë. Është turp miq, është krim që ju merrni lekët si parazitë dhe si mashtruesa”, tha Luca.
