Deputeti i Partisë Socialiste, Erion Braçe ka ngritur shqetësimin për ngërçin në funksionimin e Kuvendit, duke vënë theksin te vonesat në zhvillimin e punës parlamentare.
Braçe kërkon që komisionet parlamentare të rifillojnë menjëherë veprimtarinë e tyre, duke e konsideruar të papranueshme zvarritjen e detyrimeve ligjore që lidhen me raportimin dhe analizimin e institucioneve kyçe të vendit.
Ai ka theksuar se Kuvendi ka lënë pas dore shqyrtimin e raporteve të rëndësishme për vitin 2024 nga institucione si: Banka e Shqipërisë, Kontrolli i Lartë i Shtetit, Autoriteti i Mbikëqyrjes Financiare dhe Autoriteti i Konkurrencës.
“Parlamenti duhet të fillojë punë më në fund! Komisionet të nisin punën. Komisioni për Ekonominë, Financat e Punësimin, ka një mal me detyrime ligjore që duhet të përmbushen tani. Është shumë vonë! Banka e Shqipërisë, Kontrolli i Lartë i Shtetit, Autoriteti i Mbikëqyrjes Financiare, Autoriteti i Konkurrencës, këto së pari, duhet të raportojnë për punën e vitit 2024, përmbushjen e detyrave të lëna. Komisioni i Ekonomisë që është përgjegjës për to duhet të marrë sa më parë në shqyrtim e analizë punën e tyre edhe në raport me njerëzit. Imagjinoni, për pak ditë jemi në tetor, d.m.th po mbyllet dhe ky vit, ndërkohë që duhet të analizojmë punën e vitit që shkoi! Është shumë vooonë”, shkruan Erion Braçe.
