Kryeministri Edi Rama në podcast-in “FLASIM”, trajtoi një temë që sipas tij është tejet e ndjeshme, që lidhet me fëmijët e spektrit autik.
“Duan një trajtim ndryshe dhe një prani ndryshe gjatë orëve të mësimit”, tha kreu i qeverisë, duke përmendur edhe mësuesit ndihmës.
Gjithashtu Rama njoftoi se do të krijohet një Këshill Kombëtar për fëmijët me aftësi ndryshe. Më tej, shpjegoi se ky Këshill do ketë në përbërje përfaqësues të institucioneve, prindërve dhe mësuesve.
Në podcast, Rama kishte ftuar Nikon, student në master për kanto dhe kitarë, duke sjellë në vëmendje edhe përvojën e tij si person me spektrin e autizmit.
“Familja duhet të jetë në unison, të gjithë në një Po ose në një Jo, kur bëhet fjalë për një fëmijë autik”, tha nëna e Nikos, Eglantina. Ajo kujtoi momentin kur kuptoi për herë të parë se djali i saj kishte nevojë për një qasje dhe mbështetje ndryshe.
