Autostrada Tiranë-Durrës, ajo Durrës-Rrogozhinë, Rrogozhinë-Fier dhe Fier-Vlorë nga sot do të monitorohen 24 orë me kamera dhe për çdo shkelje të normave të shpejtësisë do të njoftohen Policia e Shtetit dhe në rast aksidentesh edhe Urgjenca Kombëtare.
Qendra Kombëtare e Monitorimit të Trafikut do të nisë monitorimin për 200 km e para të akseve kombëtare, për t’u shtrirë në të gjithë akset që janë në investarin e Autoritetit Rrugor Shqiptar.
“Synimi final është mbulimi i 3650 km. Kemi të vendosur brenda kësaj ndërtese 74 nga 122 punonjësit. 74 janë të vendosur këtu brenda, që janë operatorët e monitorimit dhe 55 i kemi të vendosur nëpër qendrat e autostradave, aty ku do të fillojë edhe lëvizja me pagesë”, tha Balluku.
Kryeministri Edi Rama premton se do t’i zhdukë policët të cilët herë pas here dalin pas shkurreve me qëllim për të kapur në gabim shoferët në akset kombëtare të vendit. Sipas Ramës, gjatë mandatit të katërt nuk do të ketë më policë në çdo rrugë për të kontrolluar shoferët, por kjo do të bëhet përmes teknologjisë.
