SPAK ka marrë zyrtarisht të pandehur kryebashkiakun e Kolonjës këtë të mërkurë, Erion Isai, i cili dyshohet për shkelje të barazisë në tendera apo ankande publike.
Erion Isai është marrë në pyetje dy herë nga prokurorët e posaçëm. Përveç tij, të pandehur janë marrë edhe 6 zyrtarë të tjerë të Bashkisë së Kolonjës, të cilët dyshohet se kanë bashkëpunuar në shkeljet e pretenduara.
Hetimet janë fokusuar në procedurat e ndjekura gjatë dhënies së disa tenderëve publikë, ku dyshohet se ka pasur favorizime dhe parregullsi.
Kryebashkiaku i Kolonjës akuzohet për veprat penale “Shpërdorim detyre”, “Korrupsion pasiv dhe aktiv”, “Fshehje të pasurisë” dhe “Shkelje të parimeve të barazisë së pjesëmarrësve në tendera ose ankande publike”.
SPAK pritet të dalë me një njoftim zyrtar në vijim lidhur me akuzat konkrete dhe fazën ku ndodhet çështja.
