Tiranë – Policia Rrugore ka bërë një apel për të gjithë drejtuesit e automjeteve që të tregojnë kujdes të shtuar gjatë fundjavës, duke marrë parasysh rritjen e ndjeshme të shkeljeve të rregullave të qarkullimit rrugor, veçanërisht gjatë ditëve të pushimit, si dhe parashikimet për reshje shiu në disa zona të vendit.
Në njoftimin zyrtar, Policia thekson se shkelje të tilla si drejtimi i mjetit me shpejtësi tej normave të lejuara, nën efektin e alkoolit, parakalimet e gabuara apo përdorimi i celularit gjatë drejtimit, përbëjnë rrezik serioz për aksidente dhe pasoja fatale.
● Rekomandimet për drejtuesit e mjeteve përfshijnë:
Tregoni kujdes në rrugët ku mund të ketë prezencë uji për shkak të reshjeve.
Respektoni kufijtë e shpejtësisë dhe shmangni sjelljet agresive në rrugë.
Mos drejtoni automjetin nën efektin e alkoolit; përdorni transportin publik kur është e nevojshme.
Vendosni rripin e sigurimit dhe sigurohuni që edhe pasagjerët ta kenë të vendosur.
Mos përdorni celularin gjatë drejtimit të mjetit.
Masat shtesë për përdoruesit e motomjeteve, biçikletave dhe monopatinave:
Gjatë natës, është e detyrueshme mbajtja e jelekëve reflektues për të qenë të dukshëm në errësirë.
Policia Rrugore bën të ditur se po monitoron të gjitha akset rrugore – urbane, rurale dhe nacionale – përmes mjeteve inteligjente si radarët për matjen e shpejtësisë, dronët dhe alkooltestuesit.
Në rast emergjence, qytetarët mund të telefonojnë në numrin falas 112, ku shërbimet e Policisë do të reagojnë menjëherë.
Policia Rrugore i bën thirrje të gjithë qytetarëve të respektojnë rregullat e qarkullimit rrugor, për të garantuar sigurinë në rrugë për të gjithë.
