Nga sot, asnjë banor pallati nuk mund të fshihet më pas shprehjes “s’është përgjegjësia ime”.
Ligji i ri Nr. 55/2025 “Për administrimin e bashkëpronësisë në ndërtesa” ka hyrë në fuqi dhe sjell rregulla të reja, detyrime të qarta dhe sanksione për këdo që shkel bashkëjetesën urbane.
Çdo shkallë, ashensor, tarracë, oborr e garazh do të jetë pjesë e dokumentacionit zyrtar si pasuri e përbashkët, duke i dhënë fund paqartësive dhe abuzimeve. Çdo pallat do të ketë administrator të certifikuar, që do të mbledhë kuota mujore, do të mbajë përgjegjësi për mirëmbajtjen dhe do të raportojë çdo vit për shpenzimet.
Vendimet e shumicës janë detyruese për të gjithë – edhe për ata që nuk marrin pjesë në mbledhje. Refuzimi për të paguar apo bashkëpunuar s’është më thjesht kapriço, por sjell gjobë.
Për herë të parë, edhe ndërtuesit kanë detyra të qarta: ata duhet të menaxhojnë pallatin derisa banorët të marrin certifikatën e pronësisë dhe të dorëzojnë dokumentet e bashkëpronësisë në Kadastër.
Nëse s’respektoni ligjin, përveç përbuzjes nga fqinjët, rrezikoni edhe ndëshkime nga bashkia! Transparenca do të garantohet edhe përmes e-Albania, ku çdo banor mund të aksesojë dokumentet e bashkëpronësisë dhe të kontrollojë si menaxhohet godina ku jeton.
