Eurodeputetja holandeze Anna Strolenberg, ka ngritur shqetësimin në Parlamentin Europian për protestën e dhunshme në Shqipëri.
Eurodeputetja holandeze ka kritikuar edhe “heshtjen” e Bashkimit Europian, të cilin e akuzoi se nuk ka dënuar përdorimin e tepruar të forcës nga efektivët e policisë.
Gjatë fjalës së saj në Parlamentin Europian, Strolenberg tha se prej ditësh po sheh pamje të protestave në Shqipëri, ku protestuesit janë qëlluar me plumba gome, ndërsa fëmijë janë dhunuar e arrestuar.
“Shqipëria e shqiptarëve dhe jo Shqipëria e Edi Ramës dhe e të pasurve”, deklaroi eurodeputetja, duke theksuar se pamjet e dhunës nuk mund të shpërfillen.
Ajo shprehu gjithashtu zhgënjimin për qëndrimin e Bashkimit Europian, i cili, sipas saj, ka dënuar dhunën e disa protestuesve, por nuk ka reaguar me të njëjtën forcë ndaj dhunës policore kundër shumicës së protestuesve paqësorë.
“Më vjen turp që BE-ja dënoi vetëm dhunën e disa protestuesve të dhunshëm, por nuk dënoi dhunën e tepruar të policisë ndaj shumicës së protestuesve paqësorë. Ne flasim për vlerat, por nuk bëjmë asgjë kur ato vlera shkelen”, u shpreh Strolenberg.
