Skënder Hita, një nga kandidatët më favorit për postin e drejtorit të Përgjithshëm të Policisë së Shtetit, është fotografuar në kafe me ish-kreun e Prokurorisë së Posaçme, prokurorin special Altin Dumani.
Takimi nuk është zyrtar dhe kjo kuptohet lehtësisht dhe nga veshja e të dyve. Altin Dumani duket i veshur casual, me pantallona të shkurtra dhe Skënder Hita po ashtu. Ata dallohen në një lokal në bregdet dhe nuk dihet nëse fotografia është aktuale.
Si drejtues i Drejtorisë Vendore të Policisë së Fierit, Skënder Hita ka mbi supe akuza të shumta nga opozita. Gjatë zgjedhjeve, Gazment Bardhi e akuzonte si ushtar të Belinda Ballukut duke paralajmëruar se do t’i bënte padi në SPAK.
Por fotografia e zbuluar nga Lapsi.al tregon se gjërat nuk ishin kaq të thjeshta. Çfarëdo porosie të ketë pasur shefi i policisë së Fierit nga Belinda Balluku, SPAK ishte një hap para denoncimeve të opozitës. Ballukun asokohe e kishte nën hetim, ndërsa drejtuesin e policisë e kishte në kafe.
