Ish-kandidati për deputet i PD, Lisandër Hoxha i ka kërkuar Sali Berishës që të thërrasë me urgjencë Këshillin Kombëtar për të përcaktuar aksionin opozitar.
Në një intervistë për ‘News24’, Hoxha theksoi se nuk duhet lejuar që vendi të shkatërrohet dhe sipas tij gjithçka duhet filluar nga brenda PD-së. Kjo, sipas tij, e çon Partinë Demokratike në piedestal në betejë me Edi Ramën ose rrezikon që PD të kthehet e papërfillshme në shoqëri.
“Një pjesë e shqiptarëve kanë ikur. Të bëjmë gjithçka që të mos e lëmë vendin të shkatërrohet, kjo është thirrje edhe për ata që nuk janë me PD. Duhet ta fillojmë brenda PD, të vendosen kushte e standarde për të qenë në maksimumin e nevojës që ka sot koha dhe pastaj të shkojmë të përballemi me Ramën përmes ndihmës së qytetarëve. PD të mbledhë me urgjencë organet e saj, Këshillin Kombëtar sepse nuk mund të shtyhet më gjatë kjo punë 5 muaj pa mbledhur Këshillin nuk ka kuptim. Nuk kam qëndrime kundra, por pro. Jam i dënuar për të pasur të drejtë, kjo ose e zgjidh PD dhe e çon në piedestal në betejë me Edi Ramën ose rrezikon që PD të kthehet e papërfillshme në shoqëri, nuk e dua një gjë të tillë sepse është e keqe për vendin”, u shpreh Lisandër Hoxha.
Hoxha kërkon që PD mos njohë rezultatin e zgjedhjeve dhe po ashtu as parlamentin por të organizojë protesta deri në plotësimin e kushtit jetik të opozitës “qeveri teknike”.
