Kryebashkiaku i Tiranës, Erion Veliaj ka ftuar Gjykatën e Posaçme që të bëjë publike audion e seancës ku kryebashkiaku pretendon se prokurori Ols Dado e ka ofenduar.
Veliaj thekson se do të vijojë të çmontoj atë dosje të stisur kundër tij me qëllimin politik për ta arrestuar para zgjedhjeve.
“E them dhe e përsëris, në atë sallë gjyqi unë jam fyer, sulmuar e kërcënuar nga prokurori im, Olsi Dado, me fjalë të cilat janë të regjistruara dhe padyshim mund të bëhen transparente për publikun. Ajo seancë ishte një kasaphanë e përgatitur për të më “vrarë” politikisht dhe kam dëgjuar lloj-lloj epitetesh, që nga “gënjeshtar”, “je patologjik” e deri te fjalia “e di se ku shkon, ky merret me mua ky …ndyrësirë”. Për të qenë të vërtetë deri në fund, ftoj gjykatën të publikojë audion e asaj seance të shëmtuar dhe pastaj qytetarët ta vendosin vetë se kush ka të drejtë. Ama, unë do të vijoj të çmontoj atë dosje të stisur kundër meje çdo ditë, pak nga pak, siç kam bërë deri më sot”, shkruan Veliaj.
