Rrjeti hekurudhor në Durrës është kthyer tashmë në një kantier ndërtimi. Ndërtimi i këtij projekti po ecën me ritme të kënaqshme.
Burime zyrtare pranë Hekurudhës Shqiptare bëjnë të ditur se është realizuar rreth 40% e volumit të punimeve. Pavarësisht kompleksitetit të zbatimit të projektit, deri më tani nuk janë konstatuar në terren vështirësi teknike, që mund të bëhen shkaktarë për shtyrjen e afatit të përfundimit të veprës infrastrukturore.
Pas realizimit të projektit, udhëtimi nga Tirana në Durrës pritet të kryhet në një afat kohor prej 22 minutash, ndërsa nga qendra e Tiranës e deri në Terminalin e Rinasit do të zgjasë 12 minuta. Sipas Hekurudhës Shqiptare, rehabilitimi i këtyre dy linjave do të përfundojë në mars të vitit 2024.
