Drejtori i Policisë, Muhamed Rrumbullaku nënvizoi edhe një herë se nuk do të ndalojë askush protestën por është vendosur një kusht i pakundërshtueshëm.
Rrumbullaku njofton organizatorët e PD-së që protesta të zhvillohet jashtë “zonës së kuqe”, perimetri i sigurisë për delegacionet e Bashkimit Europian. Autoritetet e rendit paralajmëruan se policia ka përgatitur edhe planin B në rast se protestuesit shkelin “zonën e kuqe”.
“Në këtë rast siguria e 32 delegacioneve dhe liderëve të tyre, na imponon që të vëmë sigurinë kombëtare e ndërkombëtare mbi dëshirën gjeografike për të protestuar. Policia e shtetit nuk e ndalon absolutisht protestën e lajmëruar por garanton mbarëvajtjen e saj jashtë perimetrit të sigurisë i cili është i pacënueshëm dhe i aksesueshëm vetëm nga pjesëmarrësit në samit dhe gazetarët e akredituar. Ne kemi besimin se arsyeja do të fitojë mbi emocionet e kujtdo dhe jemi të përgatitur për çdo rast kur të ndodhë e kundërta“, tha Rrumbullaku.
