Socialistët kanë miratuar më 23 korrik një rezolutë që e kanë dorëzuar në SPAK, për të cilën mësohet se i kanë lënë një muaj afat Prokurorisë së Posaçme, që të hartojë një plan veprimi për zbatimin e 32 rekomandimeve të vitit 2026. Në fokus të të cilave mësohet të jetë dhe kërkesa për përshpejtimin e zgjedhjeve të hetuesve të rinj për BKH-në.
Mësohet se përmes kësaj rezolute, mazhoranca socialiste kërkon plotësimin e 32 rekomandimeve të vitit 2026. Kuvendi i ka kërkuar Strukturës së Posaçme kundër Korrupsionit dhe Krimit të Organizuar që të rishikojë praktikën e masave të sigurimit personal, duke rritur përdorimin e masave alternative në përputhje me standardet europiane të të drejtave të njeriut, sipas Top Channel.
Po ashtu, raportohet se në rezolutën drejtuar SPAK, Kuvendi rekomandon për vitin 2026 analizimin çdo 4 muaj të kohëzgjatjes së paraburgimit dhe raportit të tij me dënimet përfundimtare, me qëllim evidentimin e rasteve kur koha e qëndrimit në paraburgim afrohet ose mbulon në mënyrë substanciale dënimin përfundimtar, si dhe marrjen e masave për shmangien e kësaj praktike. Gjithashtu kërkohet dhe reduktimi i stokut të çështjeve të mbartura dhe përmirësimi i dosjeve të dërguara për gjykim mbi të gjitha në lidhje me standardet e provueshmërisë.
Më tej, Kuvendi i jep një rëndësi të veçantë dhe pasurive të ngritura nga korrupsioni, për të cilat i rekomandon SPAK-ut që t’i ketë më shumë në vëmendje, veçanërisht në nivelet e larta të administratës publike, me qëllim që ndjekja penale të mos kufizohet vetëm në përgjegjësinë individuale, por të prodhojë edhe goditje reale të përfitimit ekonomik të paligjshëm.
Duke vijuar më tej, me në fokus zyrtarët e lartë, Kuvendi kërkon që për 2026 të zhvillohen analiza periodike për efektivitetin e ndjekjes penale në çështjet ku përfshihen zyrtarë dhe ish-zyrtarë të lartë, përfshirë jo vetëm numrin e procedimeve dhe personave të dërguar në gjykatë, por edhe shkallën e konfiskimit të pasurive. Vijimin e konsolidimit të rezultateve në hetimin dhe ndjekjen penale të çështjeve të korrupsionit dhe krimit të organizuar, me synim rritjen e numrit të procedimeve që përfundojnë me vendime gjyqësore të formës së prerë, me fokus të posaçëm te korrupsioni i nivelit të lartë, pastrimi i parave, trafikimi i narkotikëve dhe veprat penale të kryera në kuadër të grupeve të strukturuara kriminale.
Nga ana e Kuvendit kërkohet po ashtu dhe përshpejtimi i rekrutimit të hetuesve financiarë e të BKH-së dhe të oficerëve të policisë gjyqësore, duke shpërndarë në mënyrë të balancuar ngarkesën e punës. Porosi i lihet edhe për thellimin e bashkëpunimit ndërkombëtar si dhe përparimin e Sistemit Elektronik të Menaxhimit të Çështjeve, për të forcuar transparencën me raportim statistikor në kohë reale. Siç kemi raportuar dhe më parë, më 14 gusht Byroja Kombëtare e Hetimit ka shpallur procedurën e konkurrimit të hapur për 40 vende vakante, në profilin e përgjithshëm të hetuesit, afati i të cilit mbyllet me 14 gusht.
