Kryeministri Edi Rama pasditen e sotme ndodhej në Berat ku përsëriti thirrjen që të rinjtë të qëndrojnë në Shqipëri dhe të luftojnë në vendin e tyre për të realizuar ato që ëndërrojnë, pasi vendi ynë ofron pafund mundësi.
Rama theksoi se nuk do t’i thotë çfarë zgjedhje të bëjnë të rinjtë, por theksoi se të bësh një zgjedhje për të provuar veten në një vend tjetër është e natyrshme, por të thuash do shkoj në një vend tjetër se në Shqipëri nuk ka mundësi kjo nuk është e vërtetë.
“Berati nuk është si më parë. Padiskutim që nuk është ende ai që duhet të jetë dhe për këtë arsye duhet të vijojmë të punojmë së bashku me të gjithë ata që kur i thonë vetes shqiptarë dinë se çfarë thonë. Këtu ka vështirësi, por kudo ka vështirësi. Askund nuk është shtruar një tapet i kuq ku po presin të shkosh ti dhe të kesh një jetë siç e ëndërron. Kudo duhet të bësh sakrifica dhe duhet të punosh shumë për të arritur atë që do”, tha Rama.
