Ministri i Jashtëm i Rusisë, Sergei Lavrov ka reaguar pas replikave mes kryeministrit Edi Rama dhe përfaqësuesit të delegacionit rus në mbledhjen e Këshillit të Sigurimit në OKB dy ditë më parë.
Lavrov i ka shkruar një mesazh Sekretarit të Përgjithshëm të OKB-së Antonio Guterres ku i kërkon që të mos lejojë që përfaqësuesit e strukturave të OKB-së të përfshihen në nisma të politizuara në kontekstin e krizës ukrainase.
“Kemi bërë thirrje që të mos lejojë që përfaqësuesit e strukturave të OKB-së të përfshihen në nisma të politizuara në kontekstin e krizës ukrainase. Vëmendja u përqendrua në garancitë e Sekretarit të Përgjithshëm të OKB-së për t’u përmbajtur nga pjesëmarrja në iniciativa që nuk përfshijnë pjesëmarrjen e të gjitha palëve“, tha Lavrov.
Në mbledhjen e Këshillit të Sigurimit, kryeministri i Shqipërisë Edi Rama kundërshtoi Rusinë e cila u përpoq të ndalonte Presidentin e Ukrainës, Volodymyr Zelensky të mbante fjalën hapese në mbledhjen e Kombeve të Bashkuara në New York.
“Ju ndaloni luftën dhe presidenti Zelenski nuk do të mbajë fjalën”, i tha Rama ambasadorit rus, një përgjigje që ka marrë përgëzime të mëdha nga mediat botërore.
