Hapja e 42 kutive të qarkut të Dibrës ka treguar se kandidatët demokratë kanë tjetërsuar votat preferenciale mes tyre. Me vendim të dy anëtareve të PD në KAS, sot u rinumëruan 42 kuti vetëm për votat preferenciale të PD-ASHM.
Nga rinumërimi i 42 kutive, ka rezultuar se kandidatit Xhemal Gjunkshi i janë marrë 17 vota, të cilat i kanë shkuar kandidatëve të tjerë në listën e hapur të PD. Ishte vetë Gjunkshi që pretendonte se i janë vjedhur votat dhe kutitë u hapën pas kërkesës së tij.
Ndërkohë, Përparim Spahiut, i cili rezulton edhe kandidati më i votuar në qarkun e Dibrës nga opozita, i janë dhënë 49 vota tepër, të cilat u janë marrë kandidatët e tjerë në listën e hapur.
Tashmë që hapja e këtyre kutive tregoi vjedhjen e votave mes vetë demokratëve, pritet që Xhemal Gjunkshi të kërkojë rinumërim të të gjitha kutive të Dibrës, edhe për 180 të tjera.
Pasi me shifrat e reja diferenca mes Spahiut dhe Gjunkshit ngushtohet nga 120 që ishte në vetëm 54 vota.
Gjithsesi, asnjëri prej tyre nuk fitoi mandat më 11 maj, pasi PD arriti të merret vetëm 2 deputetë nga lista e mbyllur. Edhe nëse nga rinumërimi ai do të kalojë kandidatin tjetër Spahiu, nuk ka asnjë shans që të futet në Kuvend.
