Bashkëshortja e kryeministrit Edi Rama, Linda Rama ka dhënë një intervistë ku flet për gjithçka, karrierën profesionale, shembullin që ndjek në jetë, të qenurit në krah të kryeministrit të vendit, djalin e lindur në një fazë tjetër të jetës dhe planet për të ardhmen.
Pyetje: Sa e vështirë është të qëndruarit pas një njeriu politik?
“Të qëndrosh në krah të një njeriu politik nuk është e lehtë, ndërsa të qëndrosh në krah të bashkëshortit kryeministër, në vetvete përbën një sprovë. Për sa më takon mua, mund të them që të qenit në krah të Edi Ramës në opozitë dhe në krah të Edit kryeministër është rrugëtimi më i jashtëzakonshëm në jetën time. Emocione, prova dhe sprova të pangjashme me asgjë tjetër dhe përpjekje konstante për të mos u demotivuar dhe dekurajuar nga vështirësitë, të papriturat, gënjimet dhe zhgënjimet që mund të të rezervojë e përditshmja. Kjo sprovë mund të shpjegohet atëherë kur Edi të ketë përfunduar misionin e tij prej kryeministri”, rrefen Linda.
