Vijon puna me ritme të larta në rrugën Qafë Plloçë-Qukës, një nga akset e rëndësishme kombetare dhe pjesë e “Korridorit 8”.
Autoriteti Rrugor Shqiptar bëri të ditur se “në kantierin e punimeve Qukës-Qafë Plloçë në Lotin 1 po punohet në Urën nr. 4 për shtresat asfaltike, për ndërtimin e mureve mbajtëse dhe për mbrojtjen dhe stabilizimin e skarpateve”.
Kjo rrugë, me rëndësi të veçantë për zhvillimin e vendit, bashkon Korçën dhe Tiranën, duke lidhur motorin kryesor të zhvillimit të vendit me polin lindor zhvillimor të saj. Përfundimi i rrugës Qukës-Qafë Plloçë do i japë zhvillim më të madh jo vetëm këtij fshati por gjithë Mokrës, që spikat për natyrën me reliev piktoresk, mjaft atraktive për zhvillimin e agroturizmit dhe sporteve të natyrës.
Paralelisht me punimet për ndërtimin e aksit Qukës-Qafë Plloçë po punohet edhe me rrugët sekondare të cilat do të bëjnë lidhjen e fshatrave të zonës përreth me aksin kryesor.
