Një aksident i frikshëm ka ndodhur paraditen e kësaj të hënë në Tiranë, ku një autobus i linjës së “Unazës” është përplasur me disa automjete, duke lënë pas edhe 9 qytetarë të plagosur, mes tyre edhe shoferi i urbanit.
Shefi i Urgjencës, Skënder Brataj ka rrëfyer se shoferi i autobusit së “Unazës” pas aksidentit nuk kujtonte asgjë nga skena pasi nuk ishte në gjendje të mirë shëndetësore. Më tej mjeku ka treguar dhe problemet shëndetësore që mund të ketë patur shoferi, duke theksuar më tej se gjatë testit të alkoolit dhe drogërave ai ka dalë me përqindje zero.
“Nuk kishte frenim të autobusit gjë që vërteton se shoferi nuk ishte ne gjendje të mirë shëndetësore. Ne i themi gjendje elipotemie ose sinkope, humbja e koshiencës për pak sekonda ose kur nuk kujton asgjë. Gjendje elipotemie eshtë një ulje e thjeshtë e presionit në moment, ku truri nuk furnizohet me gjak dhe humbet koshiencën. Në momentin që shtrihesh kthehet kujtesa ose je si i përgjumur, domethënë dëgjon se çfarë flasin por nuk reagon dot”, tha Brataj.
