Kryeministri Edi Rama deklaroi se Shqipëria po guxon të udhëheqë në shkencë dhe teknologji në rajon, duke e vendosur inteligjencën artificiale në qendër të vizionit të saj për vitin 2030.
“Shqipëria është një komb që guxon të udhëheqë dhe jo të ndjekë. Duke krijuar një ministre të AI, të parën në botë, vendi ynë nuk po përqafon thjesht të ardhmen, por po kontribuon në projektimin e saj” u shpreh Rama.
Rama theksoi se “Diella” nuk është një lodër, por një instrument për transformimin e pushtetit shtetëror në shërbim ndaj qytetarëve, duke synuar transparencë të plotë në tenderët publikë dhe procese të tjera.
“Jemi të bindur se shumë shpejt do të ofrojmë një mekanizëm të jashtëzakonshëm për tenderë publikë transparentë e me integritet si kurrë më parë. Fuqizimi i AI është një shtyllë themelore e qeverisjes sonë” tha Rama, duke shtuar se vizioni për Shqipërinë 2030 bazohet në integritet, inovacion dhe udhëheqje shkencore.
