Tashmë pushimet kanë mbaruar në kampin socialist dhe përgatitjet për sezonin e ri politik kanë nisur. Mbledhjet radhazi kanë filluar që prej 23 gushtit në Pogradec e tashmë po vijojnë në Tiranë.
Pas takimit dje me ministrat dhe drejtuesit e qarqeve, Rama sot ka thirrur në takim të deleguarit politikë për Tiranën dhe deputetët e qarqeve me në fokus zbatimin në terren të dokumentit ‘Besa’ dhe ‘Pranisë Besnike’. Kjo e fundit synon një prani të drejtpërdrejtë të përfaqësuesve politikë në terren ndërsa ‘Besa’ vendos në qendër dëgjimin e qytetarëve.
Sigurisht pjesë e diskutimeve është dhe përgatitja për zgjedhjet vendore 2027 si dhe organizimi i punës në kryeqytet. Kujtojmë se dje kryetari i Bashkisë së Tiranës, Erion Veliaj, tërhoqi delegimin e kompetencave për Anuela Ristanin, me argumentin se kjo e fundit kishte refuzuar zbatimin e urdhrave të tij.
Nga dje, drejtuesit politikë të qarqeve janë porositur për të dalë në terren, për të komunikuar me qytetarët në zonat elektorale që përfaqësojnë dhe të drejtojnë procesin e zbatimit të dy projekteve të reja të PS.
Bashkë me strukturat e PS-së, deputetët dhe kryetarët e bashkive, ata do të hartojnë një axhendë takimesh me qytetarët për të evidentuar shqetësimet, si ato individuale, ashtu edhe problematikat e komunitetit, që lidhen me rrugët, mbetjet apo investimet. Shqetësimet e mbledhura në terren do t’u përcillen ministrive përgjegjëse, ndërsa ndjekja institucionale e tyre deri në zgjidhje do t’i ngarkohet një zëvendësministri.
