Kryeministri Edi Rama e ka cilësuar një hap të nevojshëm për sezonin e ri politik mbledhjen që pati me drejtuesit politikë dhe deputetët e Tiranës këtë të shtunë.
“Me deputetët dhe drejtuesit e tjerë të njësive organizative të Partisë Socialiste të Qarkut Tiranë, patëm sot një diskutim të dobishëm për organizimin e Pranisë Besnike, metodologjinë e BESËS dhe sistemin e ri të PasqyrAlbania, duke hedhur një hap të nevojshëm në përgatitjen e sezonit të ri politik të Partisë Socialiste”, shkroi Rama.
Takimi u zhvillua në një nga restorantet në periferi të kryeqytetit. Ai vjen pas mbledhjeve të shumta që ka bërë Rama me ministrat dhe drejtuesit politikë për strategjinë e re të PS-së për sjelljen me qytetarët para zgjedhjeve vendore.
Ky takim vjen një ditë pasi Veliaj, nga paraburgimi, la Bashkinë e Tiranës pa një kryetar të komanduar, duke ia hequr këtë kompetencë nënkryetares Anuela Ristani.
Për Bashkinë e Tiranës ka nisur një debat në radhët e socialistëve se kush do të jetë kandidat i kësaj force politike për zgjedhjet e 2027-ës. Përpos Ogerta Manastirliut, emri i të cilës u propozua nga Edi Rama shtatorin e shkuar, është vetëofruar edhe Erion Braçe.
Deputeti i Tiranës vazhdimisht bën thirrje për një proces gare brenda partisë për të zgjedhur kandidatin që do të përfaqësojë PS-në në bashkinë më të madhe në vend.
