Tirana do të “blindohet” të martën e 6 dhjetorit, kur në Shqipëri do të vijnë krerët më të lartë të Europës. Mësohet se rreth 1,500 policë do të vihen në gatishmëri dhe do të angazhohen për sigurinë e liderëve europiane.
Mirëpo, të martën e ardhshme Tirana nuk do të presë vetëm krerët e Europës, pasi atë ditë PD-ja e Sali Berishës ka lajmëruar një protestë. Policia e Shtetit dhe Bashkia e Tiranës kanë refuzuar lejen e kërkuar nga PD, me arsyetimin se tubimi në të njëjtin vend ku do të mbërrijnë dhe liderët europianë, përbën kërcënim për sigurinë kombëtare.
Një pjesë e efektivëve do angazhohet në eskortimin e delegacioneve që do të mbërrijnë në vendin tonë nga Aeroporti Ndërkombëtar “Nënë Tereza”. Përveç stafeve dhe personave të akredituar, në perimetrin e sigurisë që nis nga Kryeministria, vazhdon në drejtim të Pallatit të Kongreseve dhe përreth stadiumit “Air Albania”, nuk do të mund të kalohet nga askush tjetër. Samiti i 6 dhjetorit në Tiranë, Bashkimi Evropian-Ballkani Perëndimor, është cilësuar historik për Shqipërinë dhe imazhin e saj në arenën ndërkombëtare.
