PDIU e Shpëtim Idrizit është pjesë e koalicionit “Shqipëria Madhështore” e udhëhequr nga Sali Berisha.
I ftuar në studion “Opinion” në Tv Klan, Idrizi tha se koalicioni ishte i detyruar nga Kodi Zgjedhor dhe se lajmin për futjen e 25 partive të tjera, që sipas tij nuk njihte as 90% të tyre, e mori vesh nga televizori.
“Ky është një koalicion i detyruar nga Kodi Zgjedhor, ku ne në mënyrë të natyrshme kemi bërë koalicion me PD-në. Sigurisht që në koalicion ka një që e bën dhe që e udhëheq, që është PD e Sali Berishës dhe unë e kam marrë vesh nga televizioni, që Sali Berisha ka bërë koalicion edhe me 25 parti të tjera që me gjithë respektin që kam për ta, unë 90% unë nuk i njoh“, tha Idrizi.
Ai u ndal edhe tek fakti që pjesë e këtij koalicioni është Vangjel Dule, e me këtë të fundit duket se Idrizi nuk i ka mbyllur “hesapet”.
“Unë nuk kam dhe PDIU nuk ka problem me minoritetin grek në Shqipëri, pa dyshim edhe për kauzën e tyre. Madje nëse do të shihni se si bashkëjetojnë shqiptarët e Çamërisë dhe minoriteti, shkoni në Bashkinë e Konispolit që udhëhiqet nga një çam dhe bashkëjetesa aty shkon shumë mirë. Por, që kur Vangjel Dule mohon të nderojë shqiptarët e Çamërisë apo mban qëndrime herë-herë të qarqeve ekstremiste greke, sigurisht që Shpëtim Idrizi dhe PDIU kanë gjithmonë problem. Unë kam qenë i detyruar që të bëj një koalicion të natyrshëm më PD-në“, tha Idrizi.
