Deputeti socialist Erion Braçe thotë se hetimi ndaj Erion Veliajt është politizuar, duke iu referuar debateve në seancën e masës së sigurisë në GJKKO, më 12 shkurt 2025.
Braçe nënvizon se mllefi i treguar në atë seancë nga prokurori kundër Veliajt tregon se çështja është shkatërruar duke pranuar se paragjykimi ekziston.
Sipas Braçes, Veliaj u burgos për arsye politike 3 muaj para zgjedhjeve të “11 majit”.
“Kjo që po ndodh në rastin e Veliajt pa hyrë fare në çështje, por me kaq sa kam parë dhe me aq sa i referohet vetëm asaj seance të vlerësimit të masës së sigurisë them çështja është e shkatërruar. Më vjen keq. Çështja është shkatërruar, paragjykuar, politizuar, çbalancuar totalisht. Çështja është shkatërruar. Të dëgjosh ato dialogje në sallën e gjyqit e të shohësh si gjyqtari nuk ndërhyn në respekt të ligjit për t’i dhënë fund asaj gjëje dhe më pas ajo çfarë ndodh me zbardhjen e dialogut gjyqësor. Unë kam dëgjuar shumë më tepër se aq në sallën e parlamentit, por jo në sallën e gjyqit. Nuk mund të jetë i pranueshëm ai fjalor në sallë gjyqi. Tregon mllef, nuk tregon respekt ndaj atij që po e heton. Tregon mllef. Dhe mllefi po e shkatërron atë çështje”, tha Braçe për Report TV.
