Duket se kushtet e motit nuk kanë qenë në anën e Qeverisë këtë herë. Prej dy ditësh shiu ka “freskuar” Tiranën dhe sipas parashikimit do të vazhdojë edhe në ditët në vazhdim.
Kjo i ka prishur planet kreut të qeverisë, Edi Ramës i cili kishte planifikuar që takimet përmbyllëse në Kamzë dhe në Tiranë t’i bënte në ambient të hapur. Konkretisht, sipas burimeve mediatike, Rama njoftoi pak ditë më parë se takimi me qytetarët e Kamzës do të zhvillohej në sheshin qendror të qytetit, por ditën e sotme organizatorët kanë njoftuar se do të mbahet në pallatin “Asllan Rusi”.
Edhe takimi përmbyllës në Tiranë, ishte parashikuar të zhvillohej në Sheshin Skënderbej, por mesa duket shiu do ta zhvendosë në Parkun Olimpik. Kujtojmë se nesër është dita e fundit e fushatës zgjedhore.
